D Ella Maillart, eini vo de bedütendschte Reiseschriftstellerinne vom zwanzigschte Jahrhundert, het ihres Läbe der Entdeckig vor asiatische Wält u ihrer Vermittlig a weschtlechi Läser gopferet. Scho als ganz jungi Frou het si ds Gfüel gha, „nüüt halti se im Weschte zrügg“, u si het sech der Erforschig vo alte Kulture gwidmet, wo sech als Folg vo Umwälzige i der Zyt zwüsche de beide Wältchriege hei afa verändere. „Ohni Bedürfnis zrüggzgah“ u mit em Wunsch, ds „Reise würd ds ganze Läbe lang duure“, het si by ihrne Abetüür geng wider ds Privileg gha, d Langsamkeit z erläbe samt em interkulturelle Dialog mit de Bewohner vo de Länder, wo si bereist het; dä het ihre mängisch ds Wunder vo „Momänte vo gägesytiger Sympathie“ gschänkt. Ihri Erzählige hei derzue bytreit, e moderni Tradition vo wyblecher Reiseliteratur ufzboue, wie Oasis interdites (Verbotnegi Reis) zeigt. No vor ihrem Tod am 27. März 1997 im Alter vo 94 Jahr het d Ella Maillart d Fröid dörfen erläbe, dass ihres nöi ufgleite Wärch vore nöje Generation Läser wider entdeckt worden isch.